Оразада қалай жаттыққан дұрыс?
Оразада қалай жаттыққан дұрыс?
11 күн бұрын 766 kazislam.kz/
Елдос Қозыбаев

Рамазан айы – адамның жаны шаттанып, тәннің зекетін беретін ерекше уақыт. Бұл айда құлшылықпен қатар денсаулыққа да көңіл бөлу маңызды. Дәл қазіргі кезде Рамазан айы жазғытұры уақытына дөп келгендіктен адамдарды көбінесе шөл қысатыны анық. Ауырып қалу қаупі басым болғандықтан, дәрігерлер ауызашар кезінде мұздай су ішуден, газдалған сусындардан бас тарту керек деп есептейді. 

Ал дене бітіміне аса мән беретін адамдар сұлу мүсінін сол қалпында сақтауы үшін және жаттығуларын үзіп алмауы үшін не істеуі керек? Бұл жөнінде Елдос Қозыбаев есімді фитнес жаттықтырушысы әлеуметтік желідегі жеке парақшасында Рамазан айына қатысты ақыл-кеңесімен бөліскен екен. Соны оқырмандарымызға ұсынғанды жөн санадық. 

Елдостың айтуынша, Рамазан айында көпшілік артық салмақтан тез арылу мақсатымен жаттықса, енді біреулер бойы жинаған салмағынан, күшінен айрылып қалмас үшін жаттығады.

Оқырмандарымыз да ескере жүрсін деген ниетпен Е.Қозыбаевтың кеңестерін назарларыңызға ұсынып отырмыз:

Жалпы бұл уақытта жаттығушыларды мен екі топқа бөлемін:

1-ші топ ауыз ашардан кейін жаттығатындар;

2-ші топ ауыз ашарға дейін бекітулі күйде жаттығатындар.

  • Өз басым спортшы ретінде ауызашардан кейінгі жаттығуды дұрыс деп санаймын. Және бұл уақытта жаттықсаңыз сізде бас айналу, денедегі су мөлшерінің азаюы, күштің 10%-ға төмендеуі байқалмайды. Яғни денсаулыққа ешқандай кері әсері болмайды.

Өйткені ауыз ашып болғаннан кейін 1-2 сағаттан соң ағзаңыз керек қуат көзін жинап, қанға керекті макро және микро элементтерді толықтырып үлгереді. Судың да балансы теңесіп, сіз жаттығуға толықтай дайын боласыз.

  • Егер бұлшықетті максималды сақтап қаламын десеңіз күштемелі (силовая) жаттығуларды жасаңыз және оның уақыты ауыз бекітуге қарсы болғаны жақсы. Күштемелі жаттығулардың ұзақтығы 1 сағатқа жетпеуі тиіс. Оларға «жим лежа», «становая тяга», «приседание» (отырып-тұру) жатады.
  • Ал аузы берік күйде жаттығатындарға сәл қиындау болады. Зерттеулер көрсеткіші бойынша бұл уақытта жаттығушылардың денесінде судың 3%-ға азайып, күштің 10%-ға төмендеуін көрсеткен. Бірақ денедегі майдың үлесі тез азайып, кейде қанда гликогеннің жетіспеуінен бұлшықеттің де өз-өзін жеп көректенуіне алып келген.

Сондықтан бұл жерде артық салмақпен ылғи күресіп жүретіндер үшін жақсы мүмкіндік туады деген сөз. Иә, сіз ауызашарға дейін жаттығып алып, біткен соң бірден тамақтансаңыз да болады. Солай жасау арқылы шаршап-шалдыққан ағзаңызды су, тамақпен нәрлендіріп, қуат көзін тез қайтара аласыз.

Ескерту. Ауызашарға дейін жаттығамын деп шешсеңіз, жаттығу барысында рекорд жасап, бұрынғы нәтижелеріңізді өзгертуге тырыспаңыз, бұл өте қауіпті болуы мүмкін (бас айналып естен тану, жарақат алу, ағзаның сусыздануы). Жоғарыда айтылған нәрселерді ескеріп, өз ағзаңызды тыңдап, орташа қарқындылықта жаттығыңыз. 

0 пікір