Қадір түніндегі 10 сауапты іс пен күнәлі әрекет
Қадір түніндегі 10 сауапты іс пен күнәлі әрекет
6 ай бұрын 2625 kazislam.kz

Әбу Хұрайра (р.а.) сахабамыз жеткізген хадисте Алла елшісі (с.а.у.) «Кімде-кім Қадір түнінің артықшылығына сеніп, сауабын Алладан күтіп, ғибадат, құлшылықпен өткізсе, өткен-кеткен күнәлары кешіріледі» делінген (Бұхари, Қадір, 1).

Бірде Айша анамыз Пайғамбарымыздан (с.а.у.): «Уа, Алланың елшісі! Егер Қадір түніне жетсем қандай дұға оқиын?», – деп сұрағанда, Ол: «Аллаһумма, иннәкә афуун, тухиббул афуа, фаафу анни» (Уа Алла! Сен тым кешірімдісің, кешіруді жақсы көресің, мені де кешіре гөр!), - деп дұға ету керектігін үйреткен.

Қасиетті Қадір түнінде Құдай алдында қадіріңіздің қашқанын емес, мерейіңіздің өскенін ойласаңыз қолыңыздан келгенше төмендегі сауапты амалдарға көңіл бөліп,  күнәлі істерден абай болғаныңыз жөн! 

Сауапты істер
  1. Қадір түні туралы мағлұматтармен танысу;
  2. Түнді құлшылықпен өткізу, әсіресе Алланы зікір етіп, тасбих тарту;
  3. Пайғамбарымызға (с.а.у.) салауат айту, жиі-жиі дұға (тілек) ету;
  4. Құран аяттарын оқып, уағыз-насихат тыңдау, қолдан келгенше садақа тарату;
  5. Салихалы адамдармен сұхбаттасу;
  6. Жүрекке түскен кірбіңді жуып-шайып, түрлі күнә мен күмәннан арылу;
  7. Ата-анаңыздың ақ батасын алу, егер дүниеден өтіп кеткен болса, олар үшін Алладан жарылқау тілеу;
  8.  Араздасқан жандарыңызбен татуласу, достық қарым-қатынасты күшейту;
  9.  Өз-өзіңізге есеп беріп, өткен кемшіліктеріңіз үшін тәубе мен истиғфар (Алладан кешірім сұрау) айту;
  10. Жаратқаннан мұсылмандардың, отанның, елдің бірлігі мен амандығын сұрау.
Күнәлі істер
  1. Уақытты бос өткізуден, тоғышарлықтан сақ болу;
  2. Артық ішіп-жеу;
  3. Қолдарын қусырып, бос қиялға берілу, түні бойы көз ілмей шықсақ жеткілікті деп есептеу;
  4. Теледидардан, әлеуметтік желілерден күнәға алып баратын ақпарат қарау;
  5. Ессіз музыка тыңдау;
  6. Дүниелік әңгіме айтып отыру, мешіттерге барғанда көпшілікке сабырсыздық таныту;
  7. Ата-анаңыздың көз жасына қалу;
  8. Дастархан жайып, Қыдыр атаны күту;
  9. Арақ-шарап, есірткі заттарды пайдалану,  зина жасау;
  10. Ғайбат (өсек), өтірік айту.

 

0 пікір