Ибн Ражаб рахимаһуллаһтан жеткен бір әңгімеде, күшті мынадай қисса баяндалған.
Меккеде бір тақуа жігіт өмір сүріпті. Оның ақшасы таусылып, қатты ашығып, ажалға жақын қалған кезі еді. Мекке көшелерінің бірінде келе жатып, ол құнды өте қымбат алқа тауып алады.
Ол алқаны алады да, Харам мешітіне (Қасиетті мешітке) апарады. Көп ұзамай, бір кісі жоқ іздеп келеді.
- Ол маған алқаны дәл сипаттап берді. Мен алқаны қайтардым. Ол үшін ешқандай сыйақы алмадым. Оның орнына Аллаға жалбарынып: «Уа, Құдайым! Мен бұл алқаны сенің разылығың үшін қайтардым, маған жақсылығыңды жаудыр» дедім.
Көп ұзамай, жігіт теңіз сапарына шығады. Бір кезде, теңізде дауыл тұрып, кемесі қирайды. Ол судың үстінде бір бөренеге жабысып аман қалады. Сол бөрене оны бір аралға алып келеді. Ол жерден мешіт тауып, арал тұрғындарымен бірге намаз оқиды.
Содан кейін ол Құранның бірнеше парағын тауып алып, оқи бастайды. Арал тұрғындары оның біліміне таңданып, одан балаларына Құран үйретуін сұрайды. Ол мұны ақыға істейді. Кейінірек олар оның әдемі жазуын көріп, балаларына каллиграфия өнерін де үйретуін өтінеді.
Кейіннен арал тұрғындары оған тағы бір ұсыныс жасайды. Олар оған бір қайтыс болған жақсы адамның жетім қалған қызы бар екенін айтып, соны өзіне жар қылып алуды ұсынады. Олар:
- Келісесің бе? - деп сұрайды. Ол келіседі, сөйтіп олар үйленеді.
Жігіт алғашқы түні жаңа үйленген жарының бөлмесіне кіреді. Сол мезетте, жарының мойнынан таныс алқаны көреді. Ол оның Меккеде тауып алып, кейін иесіне қайтарған әлгі алқаның дәл өзі еді! Ол әйелінен оның тарихын сұрайды, әйелі алқаның Меккеде жоғалғанын, бірақ кейіннен бір кісінің оны тауып алып, әкесіне қайтарғанын айтады. Және де әкесінің сол алқаны тауып берген жігітке қызын бергісі келіп, оны кездестіруін Алладан жиі тілегенін де қосады.
Жарының әңгімесін тыңдап болғаннан соң жігіт қызға:
- «Ол жігіт мен боламын!» – деп сырын ашады.
Бұл оқиға адал істердің, әсіресе Алланың разылығы үшін шын жүректен жасалған амалдардың қарымтасы тосын әрі берекетті болатындығының тамаша мысалы.
Әлхамдулилләһи Раббиль аләмин!
А. Қасым
