Сауд Арабиясында күйеу жігіт қалыңдығын той үстінде тастап кетті. Бұған қалыңдықтың үйленсе де одан ары жұмыс істейтін ниеті барын жеткізгені түрткі болған. Тарқатып айтсақ, жергілікті Азаматтық хал актілерін тіркеу органына туыстарымен келген екі жастың (әдеп бойынша олардың аты-жөні айтылмаған - ред.) арасында кенеттен дау бұрқ ете қалады. Күйеу жігіт қалыңдығының жұмысын тастамайтынын осы неке қию рәсімі кезінде бір-ақ білген ғой. «Жағдай ушығып бара жатқан соң АХАЖ қызметкерлері олардан бұл мәселені бейбіт жолмен, яғни, өзара келісіп шешуді талап етті. Алайда, күйеу жігіттің отбасы ымыраға келмей бірден кетіп қалған», - деді куәгерлердің бірі ArabNews ақпарат көзінің тілшісіне берген сұхбатында. Бұл жайында аталмыш ақпарат көзіне сілтеме жасай отырып, IslamNews порталы хабар таратты. Қалыңдықтың анасы мына масқараға төзе алмай есінен танып қалған. Ал оның ұзатылғалы отырған жерінен мынадай жағдайға тап болған қызы түні бойы көз жасын бұлап шыққан. Айта кетейік, қалыңдық бұрыннан жұмыс істеп келе жатыр. Күйеу жігіт осыдан бір жыл бұрын айттырып, қызға сырға тағып кеткен болатын. Бір қызығы, олар осы бір жылдың ішінде болашақтарын қалай құратыны жөніндегі әңгімелеспеген болып шықты.