2011 жылдан бері толастамай келе жатқан Сириядағы соғыстан 200 мыңнан аса адам қаза тапқан. Бұл жайында осы елдегі адам құқығының сақталуын қадағалайтын кеңес хабарлады. Олардың есебіне қарағанда, қаза тапқандардың дені қақтығысқан тараптардың қолына қару ұстаған сарбаздары болып шыққан. Яғни, осы соғыста 130 мыңдай сарбаз қарулы қақтығыстың құрбаны болған. Ал осы соғыстан опат болғандардың үштен бірін бейбіт тұрғындар құрайды. Олардың арасында балалардың қарасы көп – 10 мыңнан асады. Ал осынау қарулы қақтығыстан жарақат алғандар саны 1 млн-нан асып жығылады екен. 10 млн-нан аса адам босқын атанған. Олардың дені Түркияға, Ливанға және Иорданияға бас сауғалаған.