Жаңа Салық кодексіне сәйкес, кейбір жағдайларда жылжымайтын мүлікті сатқанда салық мөлшері 10%-дан 15%-ға дейін өседі. Сондай-ақ, салық төлеу міндетті болатын жағдайларға да өзгерістер енгізілді. Жаңа ережелер туралы толығырақ Krisha.kz тарқатты.

Қашан салық төлеу қажет

Егер сіз жылжымайтын мүлікке бір жылдан аз уақыт иелік етіп, оны жоғары бағамен сатқан болсаңыз (яғни, сату бағасы сатып алу бағасынан жоғары болса), салық төлеуге міндеттісіз.

Салық мына жылжымайтын мүлік түрлеріне салынады:

• пәтер, үй, саяжай;
• қойма;
• автотұрақ орны немесе гараж;
• жер телімі.

Қазіргі уақытта салық мөлшерлемесі пайда сомасының 10%-ын құрайды. Бұл ереже 2025 жылдың соңына дейін күшінде болады.

Жаңа ережелер: 2026 жылдан бастап

2026 жылғы 1 қаңтардан бастап жаңа Салық кодексі күшіне енеді. Ол жылжымайтын мүлікті сату кезінде екі негізгі өзгерісті қамтиды:

1. Иелік ету мерзімі — 2 жыл

Салық төлемеу үшін жылжымайтын мүлікке кемінде 2 жыл иелік ету керек. Яғни, бұрынғы 1 жылдық талап енді 2 жылға ұзартылды.

Маңызды: бұл ереже тек 2026 жылдың 1 қаңтарынан бастап сатып алынған мүлікке қатысты қолданылады. Демек, іс жүзінде бұл 2028 жылдың 1 қаңтарынан бастап әсер етеді.

Егер сіз мүлікті 2025 жылдың соңына дейін сатып алсаңыз, ескі ереже күшінде қалады: 1 жылдан артық иелік етсеңіз — салық төленбейді.

2. Салық мөлшерлемесі 15%-ға дейін артады

Негізгі жеке табыс салығының мөлшері бұрынғыдай — табыстың 10%-ы (сатып алу мен сату бағасының айырмасы).

Алайда, егер пайда 8500 АЕК-тен асса (~2025 жылы шамамен 33,4 млн теңге), онда:

• 8500 АЕК-ке дейінгі сомаға — 10% мөлшерлеме;
• асып кеткен сомаға — 15% мөлшерлеме қолданылады.

Мысалдар

1.Сату — 2 жылға дейін, пайда — 10 млн теңге

• Салық — 10% = 1 млн теңге

2.Сату — 2 жылдан көп, пайда — 40 млн теңге

• Салық — төленбейді, себебі иелік ету мерзімі жеткілікті

3.Сату — 1 жылдан кейін, пайда — 50 млн теңге

• Алғашқы 33,4 млн теңгеге — 10% = 3,4 млн тг
• Қалған 16,6 млн теңгеге — 15% = 2,4 млн тг
• Жалпы салық: 5,8 млн теңге

Шетел азаматтары (резидент емес тұлғалар)

Қазақстанда иелік еткен мерзіміне қарамастан, 15% салық төлейді.

Салықты қалай төлеуге болады?

1.Декларация тапсыру керек (270.00 нысан) — келесі жылдың 15 қыркүйегіне дейін

2.Салықты төлеу мерзімі — 25 қыркүйекке дейін (декларациядан кейін 10 күн ішінде)

2026 жылдан бастап — люкс салығы енгізіледі

Егер жеке тұлғаның барлық мүлкінің жиынтық құны 450 млн теңгеден асса, ол сән-салтанат салығын төлеуге тиіс болады.