|
Алматыда 12 кәсіпорын сертификатталды
|
Алматы қаласындағы «Рябкова» (Конфетки-бараночки) кондитерлік өнімдері, «MDG Group.kz» (Mangal Doner), «Тлегенов М.Ш» (Palau), «HISAR YAPI» (Хисар Япы), (Çıçek Mangal) дәмханалары, «SBKCompany» кәсіпорны «QMDB Halal» стандарты талаптарына сай сертификатталды. Сертификатты «Халал Даму» директоры Айбек Асқарбекұлы табыстады.
Сертификаттарды табыстау рәсімі барысында кәсіп иелеріне халал стандартының талаптары мен артықшылықтары туралы түсіндірілді. «Халал Даму» мамандары өндіріс орындарын тексеру барысында өнімнің құрамы, шикізат жеткізушілер, санитарлық-гигиеналық жағдайлар, жұмысшылардың арнайы дайындықтан өтуі секілді бірқатар маңызды критерийлерге назар аударды.
Айбек Асқарбекұлы өз сөзінде: «Халал сертификаты – тұтынушыға сенім ұялатып, адал әрі сапалы өнім ұсынудың кепілі. Бұл – кәсіп иелерінің жауапкершілігін арттырып, нарықтағы бәсекеге қабілеттілігін де жоғарылатады», – деп атап өтті.
Сертификат иеленген кәсіпорындар мен қоғамдық тамақтану орындарына алдағы уақытта да тұрақты түрде бақылау жүргізіліп отырады. Сонымен қатар, қызметкерлерге халал талаптарына сай семинарлар ұйымдастыру жоспарлануда.
Алматы қаласындағы «Daumak» тағамдық қоспалары, «Syrniki» кондитерлік өнімдері, «One kids» емдік-профилактиклық өнімдері, «Сама лепила» және «Наурыз-фуд» жартылай фабрикаттары, «Алани» дәмханасы сертификатталды. Сертификатты Алматы қаласының бас имамы Төлеби Оспан мен «Халал Дамудың» жергілікті өкілі Өміржан Тұрсыналыұлы табыстады.
Сертификат табыстау рәсімінде сөз алған бас имам Төлеби Дәділұлы халал өнімнің маңыздылығына тоқталып, тұтынушылардың сенімі мен денсаулығы үшін жүргізілетін бақылау жұмыстарының жауапкершілігі зор екенін атап өтті. Сонымен қатар, ол кәсіпорын иелерін адал әрі сапалы өнім өндіру жолындағы еңбектері үшін алғысын білдіріп, игі істеріне береке тіледі.
Өмірзақ Тұрсынәлиұлы да өз сөзінде халал стандарттарын ұстанудың тек шариғат талабы ғана емес, сонымен қатар өндірушінің адалдығын көрсететін белгі екенін айтты. Ол Алматы қаласындағы халал сертификатталған кәсіпорындар санының артып келе жатқанын айтып, бұл бағыттағы жұмыстардың алдағы уақытта да жалғасатынын жеткізді.
