Бисмилләһир рахманир рахим, уағалейкумуссәләм уә рахматуллаһи уә бәракәтуһ!

Құрметті сауал жолдаушы!

Жаңа жылдың басталуы - барлық адамға ортақ құбылыс. Сондықтан да, жаңа жылға орай «Жаңа жыл құтты болсын!», «Жаңа жылда жаңа бақыт сыйласын!» деген сияқты ізгі тілектер айтылып жатса, оған шариғи тұрғыда әбестік көріп тұрғанымыз жоқ. Сондықтан да, қазіргі таңдағы кейбір дін ғалымдары арасында жаңа жылмен құттықтаудың харам еместігін айтатындар бар. Өйткені, қарапайым тілек айтып, құттықтауды харам деу - ақылға да, нақылға да сай емес (нақыл - шариғи дәлелдер). Мұны «арақ ішіп отырып тілек айту» секілді теріс әрекетпен пара-пар көруге болмайды.

Сондықтан да, сіз секілді ашықхат пен құттықтау өнімдерін жасап сататын кәсіп иелері Жаңа жылмен құттықтау ашықхаттарына тапсырыс түсіп жатса, оны жасаудың күнәсі жоқ деп есептейміз, яғни, жасауға да, жасамауға да еріктісіз.  

Ең дұрысы – Аллаға мәлім!
Әлхамдулилләһи Раббиль-әләмин!