Уағалейкумуссәләм! Қателікпен берілген сәлем - намазды бұзбайды. Сол себепті, төрт рәкәғаттық немесе үш рәкәғаттық намаздардың екінші рәкәғатында білмей, қателесіп сәлем беріп қойған кісі, ешқандай намаз бұзатын әрекеттерге бармастан, Аллаһу әкбар деп үшіншіге тұрады да, әрі қарай жалғастыра беруі тиіс. Намаз соңында сәһу сәждесін жасайды, өйткені үшінші рәкәғатқа тұру парызын кешіктірген болып отыр¹.

Осы тұрғыда «намазым саналмады» деп, ақшам намазының парызын қайта бастаған мұсылман, егер сол бастаған намазының алғашқы рәкәғатында әттахиятқа отырған болса, бұл рәкәғаты алдыңғы кем орындаған ақшамның үшінші рәкәғаты боп саналып кетіп, намазы дұрыс болып есептеледі. Ал бірінші рәкәғаттан соң отырмаған болса, есептелмейді. Бұл айтқандарымыз, сол арада намаз бұзатын іс-қимылға барып қоймаған болса немесе ақшамның сүннетін бастап кетпеген болса. Ал намаз бұзатын іс-әрекет жасаса немесе ақшамның сүннетін оқыса, онда екі рәкәғат қылып оқып қойған ақшамның парызын қайта оқуы керек¹. Әрине, бұл - мәселенің егжей-тегжейлі нюанстары. Оқырманның негізгі білуі керек үкім, ол - алғашқы абзацта айтылған үкім.

1Имам Шүрунбүләли: «Имдәд», 525 аят, «Нурул Изах».
2Бұрхануддин ибн Мәзә: «әлМұхитуль Бұрһәни», Намаз тарауы, отыз төртінші бөлім.