Шри-Ланканың Анурадхапура қаласы маңындағы қорықта үйір үшін болған шайқастан өлген "көсемді" жүздеген піл "ақтық сапарға" шығарып салған. Бақұлдасуы дейміз бе, басқаша айтасыз ба, өз еркіңіз, жылы жақта ғана кездесетін алып жануарлардың бұл рәсімі куәгерлердің назарын өзіне еріксіз аударған екен. Куәгерлер ерекше көріністі таспаға тартып алып, Newsflare ақпарат көзінде жариялапты. Ажал аузында жатқан "көсемнің" маңында шамамен 300 піл жиналып, тұмсықтарымен сылап-сипап, көңіл білдірген екен. Сөз орайы келгенде айта кету керек, піл - сүтқоректілер ішіндегі өліммен байланысты өз жоралғысын атқаратын жалғыз хайуан.