Норвегияның «Kongsberg Maritime» компаниясы жұртшылықтың назарына суда жүзетін жылан пішіндес құлтемірді ұсынды. Бұл құрылғы теңіз инспекциясының жұмысын жеңілдететін болады. Бұл жайында аталмыш компанияның ресми сайтында айтылған. «Eelume» құлтемірін жасауға он жыл кеткен. Су астында зерттеу жүргізуде пайдаланылатын аса қымбат әрі үлкен аппараттарды алмастыра алады. Оның икемділігі мен мықтылығы су астындағы кез келген кедергені еңсеруге мүмкіндік береді. Құлтемір құрылғысы қашықтан пульт арқылы басқарылады. Тарқатып айтқанда, ол су астындағы күн сәулесінен қалтарыс қараңғы жерлерге жарық түсіріп, бейнетаспаға тартып алады. Сондай-ақ, ол кеме секілді техникалардың бұрандаларын бұрап, зақымданған жерлерді бүтіндеуге көмектеседі.