Экономикалық өсу көбіне шикізаттық емес секторлар есебінен қамтамасыз етіле бастады
|
Экономикалық өсу көбіне шикізаттық емес секторлар есебінен қамтамасыз етілуде. Бұл туралы ҚР Парламенті Мәжілісінде өткен үкімет сағатында ҚР Ұлттық экономика министрі Қуандық Бишімбаев мәлім етті.
"Ағымдағы жылғы 8 айдың ішінде өңдеу өнеркәсібінің өсуі 0,7%-ды құрады. Металлургия өнімдері (8,3%-ға), тамақ өнімдері (3,8%-ға), мұнай өңдеу (0,6%-ға), пластмасса (2,4%-ға), сондай-ақ фармацияның (2,5%-ға) өндірісі өсті", - деді министр.
Қ. Бишімбаевтың атап өткеніндей, экспорт құрылымында да шикізат емес тауарлар үлесі ұлғайды.
"Өңделуі жоғары өнімдердің экспорты өсті, бұл - тамақ өнеркәсібі (қант пен кондитерлік өнімдер 84,0%-ға, 17,2 мың тоннаға дейін, май мен тоң май 26,9%-ға, 34,5 мың тоннаға дейін, ет және ет өнімдері 12,5%-ға, 5,8 мың тоннаға дейін), химиялық тыңайтқыштар (82,2%-ға, 114,5 мың тоннаға дейін), тоқыма материалдарын өндіру (4,4%-ға, 24,2 мың тоннаға дейін), дайын металл бұйымдар өндіру (мойынтіректер 51,2%-ға, 7,3 мың тоннаға дейін) салалары", - деді ол.
Өңірлік бөліністе өнеркәсіптің өсуі 9 өңірде және төмендеуі 7 өңірде байқалып отыр.
Өнеркәсіптік өндірістің едәуір өсуі Оңтүстік Қазақстан(4,5%-ға), Ақмола (4,2%-ға)жәнеШығыс Қазақстан облыстарында (4,1%-ға) байқалады.
Мұнай өндірудің қысқаруы есебінен Қызылорда (10,6%-ға) және Маңғыстау (3,9%-ға) облыстарында, темір (16,3%-ға) және құрамында алтыны бар (38,8%-ға) рудалардыөндірудің азаюы есебінен Қостанай облысында (4,1%-ға) өнеркәсіптің едәуір төмендегені байқалады.
Ауыл шаруашылығында өндіріс көлемі 4,9%-ға ұлғайды, оның ішінде өсімдік шаруашылығында -12%-ға және мал шаруашылығында - 2,3%-ға.
Маңғыстау облысын (16,7%-ға төмендеу) қоспағанда, барлық өңірлерде ауыл шаруашылығы өнімдерін өндірудің өскені байқалып отыр.