Уағалейкум әссәләм уә рахматуллаһи уә бәракәтуһ!

Әйгілі хадис кітаптарында орын алған риуаятта, бір ер кісі Пайғамбарымыздан «Сақинаны қандай заттан тағайын?» деп сұрайды. Оған Алла елшісі: «Күмістен тақ. Және салмағы бір мисқальды толтырмасын», - деп жауап береді[1]. Бір мискаль шамамен 4 (төрт) граммға сай келеді.

Осыған қарағанда тағатын күміс жүзігіңіздің салмағы 4 граммнан аспағаны абзал. Тақуалық тұрғысынан да, ысырапқа кетіп қалмау жағынан да ең абзалы осы. Осыған орай, Ханафи кітаптарында «ер кісілердің тағатын күміс сақинасы «бір мисқальді» аспау керек» делінген[2]. 

Әйтсе де, жүзігіңіздің салмағы аталмыш мөлшерден асып тұрса да күнәсі жоқ. Өйткені, хадисте көрсетілген мөлшерді «міндетті» деп қарамау керек – дейді хадистің түсіндірмесінде. – Оны тақуалық тұрғысынынан қарап, ысырапқа кетіп қалмау үшін ең абзалы деп түсінген дұрыс[3].