«Бараат» түні қай уақытта құлшылық жасап, қай уақытта ораза ұстаймыз?
«Бараат» түні қай уақытта құлшылық жасап, қай уақытта ораза ұстаймыз?
11 ай бұрын 43039
Абдусамат Қасым

Шағбан айындағы айтулы күн, ол – Бараат түні. «Ләйләтуль Бараат» - оттан құтылу түні. Бараат түні – қазіргі Шағбан айының 14-нен, 15-не қараған түні болады. Қазіргі күнтүзбе бойынша, ол түн - биыл (2022 ж) наурыздың 17 нен, 18-не қараған түніне сай келіп тұр.  

Бараат түні құлшылық жасап, ал ертесі күндізінде ораза ұстаудың сауабы мол. Хадис кітаптарында орын алған риуаяттың бірінде былай делінген:

«Шағбан айының ортасы болғанда түнін ғибадатпен, ал күндізін оразамен өткізіңдер. Алла Тағала сол күні күн батқанда дүние аспанына түседі де былай дейді: «Менен кешірім тілейтін пенде бар ма, кешірім етейін? Менен ризық-несібе тілейтін пенде бар ма, ризығын арттырайын? Ауру-сырқауға шалдыққан бар ма, саулық берейін?» т.б. осылай таң атқанша жалғасады»[1].

Қай уақытта құлшылық жасап, қай уақытта ораза ұстаймыз?

Шариғатта құлшылықтардың уақыты ай күнтүзбесі бойынша есептелетіндіктен, түні әуелі жүреді. Сондықтан да, «бәраат» түнінің уақыты әуелі туындайды, ал күндізі ертесі басталады. Сонда, биылғы жылы Бараат түнінің сауабынан құр қалғысы келмеген мұсылман кісі, наурыз айының 17 түні ғибадат жасап, ертесі күндіз, яғни, наурыздың 18-і күні ораза ұстайды. Үкімі - мұстахаб, орындаса сауап бар, орындамаса күнә жоқ, ерікті амал.

Құлшылық түрлері

Бараат түні оқылатын белгілі намаз түрі жоқ. Еркін құлшылық. Мысалы, нәпіл намаздар мен қаза намаздарын оқыса болады, Құран оқу, тәспі тарту, алақан жайып дұға тілеу, әртүрлі дұғаларды оқу т.б.

«Бәраат» түнін ұйықтамай құлшылық жасаумен өткізген абзал, бірақ та оған шамасы келмеген кісілер, осы түннің кез-келген уақытында тұрып, мінәжатын жасай алады.  

Оразасына ниет

Ертесі нәпіл ораза ұстағысы келген кісі ниетін «нәпіл ораза ұстамаққа» деп ниет етеді. Мысалы, сәресіде ас ішіп болғаннан кейін: «Алла разылығы үшін бүгін «Бараат» күніне орай нәпіл ораза ұстамаққа ниет еттім. ХалисалиЛләһи Тағалә» деп ниет білдірсе болады.  

Наурыздың 18-ші жұлдызы жұма күніне тура келіп тұр, ораза ұстауға бола ма?

Жылда қайталанып тұратын айтулы күндердегі ораза - жұма күніне тура келіп қалса, ол оразаны жұма күні ұстаудың мәкруһтігі жоқ. Хадисте былай делінген: «Сендер жұманың түнін өзге түндерден ерекше етіп, ғибадатқа арнамаңдар. Және жұманың күндізін өзге күндерден ерекше етіп, оразаға арнамаңдар. Алайда, әлдекімнің ұстап жүрген оразасы (сол күнге тура келген) болса, ол басқа»[2].

Алла жасаған құлшылықтарыңызға еселеп сауап жазып, тілеген дұға-тілектеріңізді қабыл етсін!


[1] Ибн Мәжә: Сүнән - №1388 хадис.
[2] «Сахих Мүслим»: Китабус сиям, №(1930) 1144 хадис.

0 пікір