Әзіреті Әли (оған Алла разы болсын) қайтыс болар алдында бар балаларын жинап, былай деп соңғы өсиетін жеткізіпті:
- Уа, ұлдарым! Арты пейіш болар жамандық – жамандық емес. Арты тозақ болар жақсылық – жақсылық емес. Пейіштен өзге барлық игілік қадірсіз. Тозақтан өзге барлық жамандық түк емес.
- Уа, ұлдарым! Кім өзінің кемшілігін көрсе, өзгенің айыбымен шаруасы болмайды. Кім Алланың жазмышына разы болса, жоғалтқанына қайғырмайды.
- Кім жаман пиғылмен қылышын қынабынан шығарса, өлімі де сол қылыштан болары хақ.
- Кім өзінің мұсылман туысына ор қазса, сол орға өзі түседі.
- Кім өзінің мұсылман туысының шымылдығын жыртса (яғни, айыбын ашса), өз балаларының да шымылдығын жыртқан болады (балаларының да айыбын біреулер ашады).
- Кім өзінің қателігін ұмытса, өзгенің қателігі таудау боп көрінеді.
- Кім өзінің көзқарасын бәрінен артық көрсе, адасады. Кім өзінің ақылын жеткілікті көрсе, жолдан таяды. (ақылым өзіме жетеді десе адасады).
- Кім адамдарға жоғарыдан қараса, қор болады.
- Кім қорқақпен араласса, соңында абыройсыз қалады.
- Кім жамандықтың шарбағын жағаласа, сөгіске қалады.
- Кім ғұламалармен мәжілістес болса, маңыздылығы артады.
- Кім қалжынға жақын болса, қадірсіз болады.
- Кім қай жөнінен көп көзге түссе, сол жөнінен танымал болады.
- Кім көп сөйлесе, қателігі көбейеді, ұяты азаяды. Кімнің ұяты азайса, тақуалығы азаяды. Кімнің тақуалығы азайса, жүрегі өледі. Кімнің жүрегі өлсе, тозаққа кіреді.
- Уа, ұлдарым! Әдеп – еркектіктің өлшемі (немесе таразысы). Көркем мінез – ең жақсы жолдас.
- Уа, ұлдарым! Саулық – он түрлі. Оның тоғызы – үндемеуде, тек Алланы тілге алу басқа. Қалған біреуі – ақымақтармен араласуды қоюда.
- Уа, ұлдарым! Исламнан асқан абырой жоқ. Тақуалықтан құрметті қадір-қасиет жоқ. Тәубеден тиымды шапағатшы жоқ. Саулықтан әсем киім жоқ. Уа, ұлдарым! Құштарлық – шаршаудың кілті, шалдығудың мінісі1.
*Мәліметтерге қарағанда Әзіреті Әлидің он төрт ер баласы және он жеті қыз балалары болғандығы айталады. Бірақ өзінен кейінгі ұрпағы бес ұлынан ғана тараған екен, олар: Әзіреті Хасан, Әзіреті Хусейн, Үлкен Мұхаммед (Мұхаммед ибн Ханафия), Аббас ибн Әли және Омар ибн Әли (Омар әл-Ағраф). Алла баршасынан разы болсын! Әлхамдулилләһи Раббиль Аләмин!
1) Абдуллатыйф Мұхаммед: «Ахкәмуль Уасыйяти».
Қазақшалаған Абдусамат Қасым
