Канаданың Регина қаласындағы мемлекеттік зерттеу университетінде мұсылман студенттеріне дәрет алуға жағдай жасалған. Аталған жоғарғы оқу орнының әкімшілігінің пәрменімен әжетханалардың қол шаятын жерінде дәрет алуға қолайлы шұңғылша қойылған. Яғни, дәрет алғысы келген адам ендігі жерде аяғын жуу үшін қол шаятын шұңғылшаға аяғын көтеріп жатпайды. Әрі бұл тазалыққа жат әрі наным-сенімі өзгелердің жиіркенішін тудыратын еді. Арнайы дәрет алатын жабдықтарды сатып алу үшін қомақты қаржы (35  000 доллар) жұмсалған. Осы білім ордасының қабырғасында білім алып жүрген мұсылман студенттер қауымдастығының жетекшісі Маһмұд Ессалаһ өз үйіндей еркін сезінетін осындай университетте оқып жүргенін мақтаныш тұтады.