Қырғызстан парламентінің бірнеше депутаты кәмелет жасына толмағандарды зорлау бойынша айыпталғандарға қолданылатын жазаны қатайту туралы ұсынысты ортаға тастады. Бұл жайында «Бішкек ақшамы» ақпарат көзі хабар таратты. Қырғыз депутаты Айнұр Алтынбаева отбасындағы зорлық-зомбылыққа қатысты қылмыстық жауапкершілікті күшейтіп, балаларды зорлаған айуандарды өмір бойына бас бостандығынан айыруды немесе өлім жазасына кесуді сұрады. Тағы бір депутат Ысқақ Маслаиев әріптесінің ұсынысына қосылатынын айта келіп, ондай қылмыскерлерді өмір бойына бас бостандығынан айырғанша бірден өлім жазасына кесуді құптайтынын жеткізді. Өйткені, оны өмірден озғанша мемлекет қазынасынан шығын шығарып, асырауға тура келеді. Бұл мемлекетке тиімсіз жол.