Украинаның мемлекеттік көші-қон қызметі төлқұжат үшін кез келген бас киіммен, соның ішінде, шариғат шәлісін жамылып суретке түсуге тыйым салды. Бұл жайында аталған қызметтің жетекшісі Сергей Гунько мәлім етті. news.i.ua ақпарат көзінің таратқан хабарына қарағанда, 1994 жылы Украинада қабылданған мемлекеттік талапқа сай осындай тыйым салынып отыр. Киев қаласындағы Қырым автономиялық республикасының мұсылмандар діни басқармасының мүфтиі Айдар Рүстемовтың айтуынша, шариғат шәлісін жамылып түскен суретімен төлқұжат рәсімдемеген жағдайда өздерінің заңгеріне шағымдануға кеңес беріп отыр. Жергілікті мұсылмандар бұл тыйымның күшін жою үшін күресетіндерін мәлімдеді.