«Школа Инвестора» сайты әлемдегі орташа жалақы рейтингісін жариялады.

157 елдің ішінде Қазақстан 86-шы орынға тұрақтаған.

Дереккөзінің мәліметінше, республикадағы орташа жалақы - 480 доллар. 2016 жылы бұл көрсеткіш 339 доллар болған екен.

Жалақысы ең көп ел - Швейцария. Бұл елдегі орташа жалақы 3855 доллар деп есептелген. Одан кейін Норвегия мен Люксембург, бұл екі елде жалақы мөлшері 3781 және 3565 доллар болған.

Ал жалақысы ең төмен ел Зимбабве екені анықталыпты. Ондағы орташа жалақы бар болғаны 21 доллар көрінеді.

Бұл рейтингте Ресей 69-шы орынға табан тіреген. Ресейде орташа жалақы 615 доллар мөлшерінде.