Ұшуымен қатар суда да жүзе алатын дрон жасалды (видео)

АҚШ-тың Ратгер университетінің ғалымдары мен студенттері ұшумен қатар суда да жүзе алатын жаңа дрон ойлап тапты. Алыстан басқарылатын бұл техника ұшып жүріп, су асты режиміне тез бейімделеді немесе керісінше. Аталмыш жобаға АҚШ-тың мұхитты зерттейтін кеңсесі мүдделілік танытып отыр. Себебі, бұл дрон көпірлердің іргетасын, судың ластану деңгейін қадағалауға және іздестіру-құтқару жұмыстарын орындауда таптырмас көмекші бола алады. Бұл техника, сондай-ақ, әскери мақсатта да пайдаланылуы мүмкін. Мәселен, су астына жасырылған минаны іздеу кезінде.