Қытайдың Синьцзян аймағында жергілікті билік Компартия мүшелеріне, мемлекеттік және бюджеттік мекемелердің қызметкерлеріне қасиетті Рамазан айында ораза ұстауға тыйым салды. Синьцзян аймағының түрлі ресми сайттарында шенеуніктерге, мемқызметкерлерге, педагогтарға, студенттерге және мектеп оқушыларына ораза ұстауға тыйым салынатыны жөнінде ескертулер пайда болды. Бұл жайында «IslamNews» порталы «International Business Times» ақпарат көзіне сілтеме жасай отырып, хабар таратты. Ол ол ма, кейбір қызметкерлерден осы айда ораза ұстамау жөнінде қолхат алып жатыр. Сондай-ақ, саудагерлерден қасиетті Рамазан айында күндізгі уақытта сауда орындарын жаппауды және дүкен сөрелерінде ішімдік пен темекі өнімдерін тізіп қоюды қатаң талап етіп отыр.