Ресей Федерациясының мемлекеттік думасының қарауына жалған неке қидырғандарды азаматтықтан айыру қарастырылған заң жобасы енгізілді. Бұл жайында islam.kz порталы lenta.ru ақпарат көзіне сілтеме жасай отырып мәлім етеді. Калуга облысының заң шығарушы ассамблеясы көтерген бастамаға сәйкес жалған неке қию, сондай-ақ, орыс тілін білу туралы жарамсыз сертификаттарды беру азаматтықтан шығуға негіз болуы керек. Аталмыш заң жобасының авторлары жалған құжаттар мен мәліметтерді пайдалануды сот тәртібімен анықтау керек, деп атап өтті. Сөз орайы келгенде айта кету керек, бұрын РФ ішкі істер министрлігі жалған неке арқылы мигранттарды заңдастырумен күресетін заң жобасын әзірлеген болатын.