Мысыр билігі ел астанасы - Каир қаласындағы Амр ибн әл-Ас мешітінің имамы әрі шейх Мұхаммед Жибрилді Қадір түнінде айтқан дұғасы үшін қызметінен қуды. Имам тарауық намазынан кейін: «О, Алла, қанымызды төгіп, балаларымызды жетім қалдырғандарды жазала. О, Алла, «Перғауын сиқыршылары» - тілшілерді жазала. О, Алла, жемқорларды жазала. Әділетсіздік істегендерді жазала. О, Алла, баспанамызға қол сұққандарды жазала. Тирандар мен жәбір көрсетушілерді жазала. Қалтасын ойлайтын шейхтерді жазала»,- деп дұға еткен екен. Шейх дұғасында ешкімнің атын атап, түсін түстемесе де, оның бұл дұғасы билік тізгінін ұстап отырғандарға ұнамай қалған. Олар бұл дұғаны өз аттарына айтылып жатқандай қабылдап, имамды қызметінен қуды. Дәлірегі, уақыптар министрі Мұхаммед Мұхтар Гумаа шейхтың қызметін тоқтату туралы жарлыққа қол қойды. Ол ол ма, оның үстінен осы дұғасы үшін қылмыстық іс қозғады.