Шаңырақ көтергеніне көп уақыт өте қоймаған мұсылманның қанын мойнына жүктеп, 24 жылға бас бостандығынан айырылған 31 жастағы Лайам Уитнелл есімді қылмыскер Лондон түрмесінде туған күнін ас та төк тойлап, суретін әлеуметтік желіге орналастырған екен. Оның бұл ессіз қылығы қайғыдан қан жұтып жұтып, қара жамылып отырған марқұмның туыстарына ауыр тиді. Дәлірегі, 24 жастағы жас жігіттің өмірін қиған қылмыскер жазасын өтеп жатқан жерге мейрамханадан фирмалық халуа мен кебаб алдырып, түрмеде емес, дәп бір туған әкесінің шаңырағында жүргендей тайраңдаған көрінеді. Осыдан жарты жыл бұрын отау құрған тегі бангалдештік Коушар Хұсейн тірі жанға тілдей зиян, қылдай қиянат көрсетпеген аса сабырлы, момын адам болған екен.