— 2026-2028 жылдарға арналған республикалық бюджетте Денсаулық сақтау министрлігіне ТМККК аясында қан донорларына 0,25 АЕК мөлшерінде ақшалай өтемақыға 809,8 млн теңге (2026 жылы — 257,8 млн теңге, 2027 жылы — 274,2 млн теңге, 2028 жыл — 277,8 млн теңге) сомасында шығыс көзделген. Қан донорларына ақшалай өтемақы мөлшерін ұлғайту және Құрметті донор мәртебесін қалпына келтіру республикалық бюджеттен қосымша шығыстар бөлуді талап етеді, — деді министр депутаттық сауалға берген жауабында.

Оның мәліметінше, «Халық денсаулығы және денсаулық сақтау жүйесі туралы» кодекске сәйкес облыстардың, республикалық маңызы бар қалалардың және астананың жергілікті өкілді органдары донорларға қосымша көтермелеу беру туралы шешім қабылдайды. Сондай-ақ облыстардың, республикалық маңызы бар қалалардың және астананың жергілікті атқарушы органдары қан мен оның компоненттерінің ерікті өтеусіз донорлығын дамыту жөніндегі шараларды іске асыруды қамтамасыз етеді.

— Сонымен бірге, республикалық және жергілікті бюджеттердің шығыстарын оңтайландыру және оларға басымдық беру мақсатында 2028 жылғы 31 желтоқсанға дейін республикалық және жергілікті бюджеттердің шығыстарын жоспарлау кезінде әлеуметтік саладағы жаңа бастамаларға бюджет қаражатын бөлуге мораторий енгізілгендігін атап өтеміз. Осыған байланысты, министрлік ДСМ-ге мүдделі мемлекеттік органдармен бірлесіп қан донорларын көтермелеудің материалдық емес шараларын ұсыну мүмкіндігін қарастыруды ұсынды. Баяндалғанның негізінде, қан донорлығын дамыту жөніндегі депутаттардың ұсыныстары ДСМ-нің мүдделі мемлекеттік органдармен және жергілікті атқарушы органдармен бірлесіп қарауын талап етеді, — деді Мәди Тәкиев.