Islam.kz ұлттық, рухани-ағарту порталы

Сараңдық пен жомарттықтың негізі

Алланың құлдары, жақсылап біліп алыңыздар! Алла Тағала Құранда елшісі Мұхаммедтің (оған Алланың сәлемі болсын) тілімен былай деген: «Кімде-кім нәпсінің сараңдығынан сақтанса (сақталса), міне, солар – нағыз құтылушылар (мұратқа жетушілер)» (Хашр сүресі, 9-аят). Ал бойын сараңдық пен ашкөздік кернеген адам нәпсісінің шайқылығынан сақтана да алған жоқ, мұратқа да жеткен жоқ.

Сараңдық – Тозақта өсіп тұрған бір бәйтерек. Оның бұтақтары бұл дүниеге қарай созылып тұрады. Бұл – Шайтанның ағашы. Кімде-кім оның бір бұтағына жармасса, ол ағаш оны сүйреп барып Тозаққа бір-ақ тастайды.
Жомарттық – Жәннатта өсіп тұрған асыл бәйтерек. Оның да бұтақтары бұл дүниеге қарай иіліп тұрады. Кім оның бір бұтағынан ұстаса, ол ағаш оны Жәннаттың рахатына қарай тартып алады. Жомарттық – Аса Жомарт Алланың көркем мінезінен. Кім жомарттықты бойына дарытса, ол қарғыс атқан шайтанды қаһарландырады.

Бұған дәлел: Алла Тағала ешқашан жомарт емес адамды пайғамбар етіп жіберген емес және жомарт емес ешбір салих (ігі) құлды көре алмайсыздар.

Жомарттық – Пайғамбарлар мен Әулиелердің мінезі

Жомарттық – барша пайғамбарлар мен шыншыл әулиелердің, тіпті Әлемдердің Раббысының көркем сипаты.

Ей, мүмін ерлер мен мүмін әйелдер! Ей, пайғамбарлардың соңғысы Мұхаммедтің (с.а.у.) үмбеті! Бұл көркем мінезді өзара қарым-қатынастарыңызда кеңінен қолданыңыздар!

Дұға

Раббысын еске алып көз жасын төкпеген көзден Алла сақтасын!
Аллаға ынтызар болмаған суық жүректен Алла сақтасын!
Алланың құзырына жетпейтін қайырсыз дұғадан Алла сақтасын!
Алладан өзгеге құл болудан, Өзінен өзгеге жалтақтаған қорлықтан Алла сақтасын!

Ибн Жәузи: "Бүстәнуль Уаъизин". Уағызшылардың бақшасы.